هالمرة بالعامية

رح أكتب هالمرة بالعامية يمكن اللي بدي أحكي يوصل أسهل..

اليوم مريت بموقف عنجد مش عارفة أوصف كم كان بوجع..
يعني وجعه كان لدرجة اني حسيت قلبي عم بنعصر..
كنت واقفة بغرفة من غرف البيت و ما كان في ولا أي صوت..
فجأة إجاني شعور أول مرة بحس في..
حسيت بإشي ماسكني بقوة بتوجع من جوة.. صار نفسي أبكي و أصرخ بأعلى صوت و أكبر قوة عندي أركض عند أختي اللي قاعدة بغرفة تانية حتى أحكيلها انه "بابا مات"..
ضلت هالجملة تدور براسي ألف مرة..

ما بعرف كيف الشعور.. اجى على بالي أضرب و أكسر..
أبكي و أصرخ..
حسيت زي كأنه في حدا مسك اشي من جوة و خلعه..
أو كأنه وصلني خبر موته بهديك اللحظة..

بعدين صفنت شوي..
تزكرت انه بابا إله متوفي سنة وشوي..
ترحمت عليه و دعيتله وقرأت الفاتحة على روحه..
كتمت نفسي حتى هديت..
حملت حالي وطلعت من هديك الغرفة ورجعت قعدت مع أختي ولا كأنه في إشي..

مش عارفة مالي..
يمكن النفسية شوي تعبانه.. أو حتى يمكن كتير تعبانه..

أخخخ يا قلبي..
خلص خلصت القصة..


الساعة 2.33 الفجر
التاريخ 4.1.2012
أنا اللي كتبت "الاء"